(Qui la traduzione in italiano.)
E aici seo candidadu pro sa lista “Gentes” in sa coalitzione “Sardegna Possibile” ghiada dae Michela Mùrgia, s’iscriitora. Custu mangianu seo artziadu a su segundu pranu de su Comunu de Casteddu in Via Sonnino e totu una sèrie de timbros, firmas e paperàgia m’ant cunfirmadu ca custu seo imoe: unu candidadu.
Cando penso a custa cosa chi apo fatu penso ca seo su sòlitu macu, ca su traballu miu mi praxet a su puntu ki ddu cunfundu cun sa vida mia etotu, ma penso puru ca sa polìtica dd’apo sempre fata e mancari no dda fadia praticamente, dda tenia in conca. Ca est giustu sighire a is interessos particulares nostros, ma est giustu puru a pigare in contu is cunditziones suas, ki sunt colletivas.
Sù chi penso est ca nosàteros depimus in custu momentu istòricu defèndere sa Sardigna. Semus asuta de un’atacu cumpletu a is cunditziones de vida e de traballu de is Sardos. Isulados de una mobilidade ki no esistet, ocupados de is militares e de indùstrias incuinadoras e imbrutadoras, ki produsint rikesa in aterue e malaidia in logu nostru, oprìmios de unu sistema polìticu corrùmpiu e oligàrkicu, sdorrobados de is siendas nostras, cumentzende de s’energia e acabende cun su dinare de is impostas, cullionados de s’idea ki nos’ant postu in conca de èssere gente de pagu contu, prena de difetos, e pagu bona a fàere cosas importantes, e ki totu sù ki est sardu est malu opuru “grezu”. Ofèndios in sa dinnidade nostra dònnia die.
Duncas, seo in polìtica cun gana meda de gherrare pro una cosa ki arresumu in tres foeddos: DEMOCRATZIA, INNOVATZIONE E PARIDADE.
- DEMOCRATZIA, ca su sistema polìticu no est tanti democràticu in Sardigna. No est su pòpulu su soberanu, ma is “deghe o dòighi famìlias”, comente est iscritu in Procurade’e moderare. Seus a suta de un’oligarkia partitocràtica, prena de dinare e privilègios, rica de clientelas e de barra, pòbara de mèritu, ki nos’est ochende! Sù ki est sutzèdiu in su Partidu democràticu in custas dies amustrat ca totu sa polìtica sarda est assinnada a is clientelas locales pro is afareddos, ma pro is cosas importantes sunt piciokeddos in Moncler arribende de Roma a detzìdere. Duncas, tocat a si liberare de custa dipendèntzia pro fàere frorire sa democratzia in Sardigna.
- INNOVATZIONE, ca una sotziedade oberta est una sotziedade ki innovat, ponende a pari innovatzione tècnica e innovatzione sotziale, ca no sunt cosas ki pertocant a mundos diversos, ma a sa pròpiu esperièntzia e a is pròpias fainas de sa gente. Fàere polìtica de s’innovatzione bolet nàrrere a fàere polìtica tout court, ca bolet nàrrere a cambiare is cosas. Sa polìtica de s’innovatzione e de sa chirca ki s’est fata fintzas a imoe in Sardigna tocat a dda torrare a pensare a manera profunda, proite no ddoe at currispondèntzia aintre de su dinare ispèndidu e de is arresultados, e proite sighet modellos geràrkicos antigos ca tocat a torrare a pensare in su mundu digitale e de is retzas inue bivimus.
- PARIDADE, paridade aintre de is òmines e de is fèminas, paridade aintre de is limbas de Sardigna e tutela de su sardu ke limba pròpia de Sardigna e paridade de totus is tzitadinos calekisiat sa cunditzione sotziale, sessuale, fìsica issoro. Teneus bisòngiu ca su discursu de sa paridade torret a pigare su tzentru de su discursu polìticu, ca est sa paridade, s’uguagliàntzia, ki at criadu su fundòriu de sa democratzia moderna. Est in cantu persones ca intraus in sotziedade, tenende is pròpios diritos. Su privilègiu de sa nàschida e de sa rikesa depet èssere cuntènniu, ma de aberus, no sceti in su paperi. Epuru, sa manca traditzionale si nd’est iscarèssida in totu custos annos. At defèndiu su traballu ma sceti pro pagos, at partecipadu a su persighimentu de sa gente gay, lèsbica, transgender e bisessuale ke gente “isballiada”, una bregùngia mala ki depet assolutamente acabare pro si pensare unu pòpulu tzivile, at contenidu e limitadu sa paridade aintre is gèneres masculinu e femininu, at dispretziadu is minorias de dònnia banda, at cumbàtidu kentze trègua sa limba sarda e ìs ativistas e espertos ki ant gherradu a dda sarbare e a dda fàere bivire.
Sardegna possibile est su logu giustu pro gherrare oe. Sa dereta est dominada de su clientelismu in pràtica e de su populismu zonafrankista in su discursu. Est corrùmpia fintzas a sa raixina de is pilos, e de dònnia manera deo seo una persone de manca. Ma sa manca, apustis de àere interradu a Soru, como s’est afidada a unu Mariumonteddu, espressione sa prus pura de s’establishment ki at derutu sa Sardigna cun polìticas sceti econòmicas, e ki sunt fallidas puru. Sardegna possibile est un’esperièntzia democràtica esaltante, tenet una leader ki est una fèmina de gabale, e deo mi sento cumpletamente in domo mia.
Duncas, ita boleis ki si nera: Votaimì e fadeimì votai, seo candidadu in sa Lista GENTES de sa coalitzione SARDEGNA POSSIBILE in sa provìntzia de Casteddu.
E chi Deus bosi paghit is passus, ki ddu fadeis!
blog di Alessandro Mongili 